Nije lako predvidjeti kada će taj događaj da uslijedi, ali bi se moglo dogoditi bilo kada u razdoblju od sada pa do septembra.

Nebeski ples između dvije zvijezde udaljene 3.000 svjetlosnih godina rezultovaće tako jarkom eksplozijom koja će moći danima da se vidi golim okom, rekli su u petak astronomi sa Univerziteta “Nottingham Trent”.

Eksplozija u sastavu T Coronae Borealis, koja se dešava jednom u životu, izgledaće kao nova zvijezda koja žarko sjaji na noćnom nebu, prije nego što ponovo izblijedi i iščezne narednih 80 godina.

Profesor Daniel Braun objašnjava da se taj nebeski događaj naziva ‘nova’, kada se blještavost zvijezde ubrzano pojačava. Po njegovim riječima, nije lako predvidjeti kada će taj događaj da uslijedi, ali smatra da bi se mogao dogoditi bilo kada u razdoblju od sada pa do septembra.

“Čeka nas poslastica, vidjećemo tzv. novu zvijezdu na nebu”, rekao je Braun i ističe da T Coronae Borealis nije u stvari jedna zvijezda, već se radi o dvije zvijezde koje kruže jedna oko druge.

“Ono što taj par čini tako jedinstvenim je da ta ista zvijezda vrlo često tako jako pojača svoju svjetlost te nam postaje lako vidljiva”, rekao je astronom.

“Masivnija zvijezda u tom paru je bijeli patuljak koji u volumenu velikom poput naše Zemlje može imati istu masu kao naše Sunce”, rekao je Braun.

Saputnik u tom paru je ostarjeli crveni div koji se širio i svoj materijal odlagao na bijelog patuljka.

“Otprilike svakih 80 godina bijeli patuljak prikupi dovoljno materijala da se zapali u termonuklearnoj eksploziji i snažno pojača svoju svjetlost”, rekao je Braun.

“Sada je vrijeme za još jednu takvu eksploziju za T Coronae Borealis čija će se svjetlost sa 11mag, jedva vidljiva na tamnom nebu, povećati na 2mag, te će se moći vidjeti golim okom čak i na zagađenom nebu”.

“Nova” će postati vidljiva u blizini sazviježđa Herkula. Astronomi objašnjavaju da su te ‘nove’, u suštini, poput hidrogenskih bombi.

Izvor: B92